३२ असार २०८१, सोमबार

मन्त्रिपरिषद्‍को निर्णयपछि पनि बन्चरेडाँडामा फोहोर विसर्जनमा अवरोध कायमै

  • २९ फागुन २०७८, आइतबार
Image


काठमाडौं- नुवाकोटको सिसडोलमा फोहोर विसर्जनमा गरिएको अवरोध आज पनि कायमै छ।

काठमाडौं उपत्यकाको फोहर विसर्जन गर्ने बन्चरेडाँडामा मन्त्रिपरिषद् बैठकले ल्याण्डफिल साइटमा फोहर व्यवस्थापनको क्रममा उत्पन्न हुने प्रभाव न्यूनीकरण गर्न उच्चस्तरीय समिति बनाउने निर्णय गरेपनि आफूहरुको माग सम्बोधन नभएको भन्दै फोहर विसर्जन कार्यमा जारी अवरोध कायमै रहेको सरोकार समितिले जनाएको छ।

यही फागुन २३ गतेदेखि सुरु भएको स्थानीयवासीको विरोधको कारण आज पनि काठमाडौंबाट फोहर आउन नदिएको 'बञ्चरेडाँडा ल्यान्डफिल्ड साइट प्रभावित क्षेत्र सरोकार समिति'का संयोजक श्रीराम ढुङ्गानाले जानकारी दिए।

उनका अनुसार स्थानीयासीले राखेको माग प्रभावित क्षेत्रको गुठीको जग्गा कानुनी प्रक्रियाअनुसार रैकर गर्नुपर्ने, प्रभावित क्षेत्रको उच्च प्रभावित बनेका वस्ती स्थानान्तरण गर्नुपर्ने, फोहर विसर्जन गर्न जाने सडकको स्तरोन्नति हुनुपर्ने र फोहर विसर्जन वैज्ञानिक रुपमा गर्नुपर्ने रहेको छ।

'सरकारले प्रभावित क्षेत्रमा देखिएका समस्या समाधानका लागी उच्चस्तरीय समिति र 'र्‍यापिड एक्सन टास्क फोर्स' गठन गर्ने निर्णय गरे पनि त्यसमा हामीहरूको जायज माग सम्बोधन भएको छैन,' संयोजक ढुङ्गानाले भने, 'नयाँ माग र समस्या केही होइन, यसअघि भएको सहमतिको पालना गर्न सरकारीस्तरबाट स्पष्ट निर्णय नआएसम्म विरोध कायम रहन्छ।'

प्रभावित क्षेत्रका बासिन्दाले नुवाकोट र धादिङमा पर्ने विभिन्न गाउँ (यसअघिका विभिन्न अध्ययन प्रतिवेदनले मानव बसोबासको लागि जोखिम भनेको स्थान) का बस्ती स्थानन्तरण र उक्त क्षेत्रको करिब तीन हजार रोपनी जग्गा अधिग्रहण हुनुपर्ने माग मुख्यरुपमा उठाएका छन्। 


प्रतिक्रिया

सम्बन्धित खवर